By: Alex Galang
OLONGAPO CITY – Naaresto ng mga awtoridad ang dalawang target na nasa drug watch list bilang Street-Level Individuals (SLI) sa isang matagumpay na buy-bust operation sa Barangay Barretto noong gabi ng Huwebes (Hulyo 30, 2026).
Kinilala ni Police Major George Francis B. Molina, Acting Station Commander ng Olongapo City Police Station 6 (PS6), ang mga nadakip na suspek na sina Aaron Nathaniel Mateo y Tarayo, alias “Banlag,” 23, at Kristoper Luna y Pagallaman, alias “Peng-Peng,” 24. Ang dalawang suspek ay parehong binata, walang trabaho, at nakatira sa Purok 13, Barangay Barretto, Olongapo City.
Ikinasa ng Station Drug Enforcement Unit (SDEU) ang target na operasyon bandang alas-5:55 ng hapon nitong Hulyo 30 sa Brisas Del Mar Road. Inilunsad ang operasyon base sa binalidang impormasyon sa ilalim ng Target Intelligence Packet (TIP) control numbers B-2026-030-PRO3-OCPO-PS6 at B-2026-031-PRO3-OCPO-PS6.
Nasamsam sa operasyon ang apat na transparent plastic sachet na naglalaman ng hinalang methamphetamine hydrochloride (shabu) na may tinatayang kabuuang timbang na 1.83 gramo. Ang mga nakumpiskang iligal na droga ay may Standard Drug Price (SDP) na nagkakahalaga ng Php 12,444.00. Narekober din ng mga operatiba ang Php 300.00 bill na ginamit bilang buy-bust marked money.
Agad na dinala ang mga suspek at mga nakuhang ebidensya sa Police Station 6 para sa karampatang pagproseso, pagtimbang, at opisyal na dokumentasyon. Inihahanda na ang mga kasong kriminal laban sa dalawa para sa paglabag sa Republic Act 9165, o ang Comprehensive Dangerous Drugs Act of 2002.
Pinuri naman ng pamunuan ng Olongapo City Police Office (OCPO) ang operating unit ng PS6 para sa kanilang mabilis na koordinasyon at walang tinag na dedikasyon upang sugpuin ang talamak na bentahan ng iligal na droga sa mga lokal na komunidad.