By: Alex Q. Galang
OLONGAPO CITY — Arestado ang isang 41-anyos na lalaki matapos makumpiska sa kanya ang apat na sachet ng hinihinalang shabu na may kabuuang bigat na humigit-kumulang 2.43 gramo sa isinagawang buy-bust operation sa Barangay Barretto dito noong Setyembre 27, 2026.
Ayon kay PMAJ George Francis B. Molina, hepe ng Police Station 6, kinilala ang suspek na si Manolo Marty y Dumalasa, alyas “Manoling,” 41, walang asawa at walang trabaho, at residente ng Sitio Ibayo, Barangay San Isidro, Subic, Zambales.
Sinabi ni Molina na isinagawa ng Police Station 6 Drug Enforcement Unit (PS6DEU) ang operasyon dakong alas-11:40 ng umaga sa Mangahan Street, Barangay Barretto, sa ilalim ng Target Intelligence Packet (TIP) Control No. B-2026-039-PRO3-OCPO-PS6.
Nagresulta ang operasyon sa pagkakaaresto sa suspek at pagkumpiska ng apat na sachet na naglalaman umano ng hinihinalang shabu na may tinatayang kabuuang bigat na 2.43 gramo.
Ayon sa pulisya, tinatayang P16,524 ang Standard Drug Price ng nakumpiskang hinihinalang droga. Nabawi rin ang P300 na ginamit bilang buy-bust money.
Dinala ang suspek at mga nakumpiskang ebidensya sa Police Station 6 para sa dokumentasyon at kaukulang disposisyon.
Patuloy namang isinasagawa ang kaukulang proseso laban sa suspek alinsunod sa umiiral na batas.