OLONGAPO CITY — Nagkaloob ng tulong si Zambales 1st District Representative at Deputy Speaker Jay Khonghun sa mga delivery rider sa Olongapo City bilang pagkilala sa kanilang ambag sa lokal na ekonomiya at suporta sa kanilang pang-araw-araw na kabuhayan.
Layunin ng inisyatiba na makatulong sa mga rider na patuloy na naghahanapbuhay sa kabila ng mahabang oras ng pagtatrabaho, matinding init ng panahon at mga panganib sa kalsada.
Araw-araw na bumibiyahe ang mga delivery rider sa iba’t ibang bahagi ng lungsod upang maghatid ng pagkain, produkto at iba pang pangangailangan ng mga kostumer, na nagsisilbing mahalagang bahagi ng operasyon ng mga lokal na negosyo.
Sa pamamagitan ng kanilang serbisyo, napapadali ang transaksiyon sa pagitan ng mga tindahan, restawran at mamimili, habang nagkakaroon din ng dagdag na oportunidad ang mga negosyong gumagamit ng delivery platforms upang maabot ang mas maraming kostumer.
Ang tulong na ipinagkaloob ay inaasahang magsisilbing dagdag na agapay sa mga gastusin ng mga rider sa kanilang araw-araw na pamamasada at sa pagtugon sa pangangailangan ng kanilang mga pamilya.
Bahagi ito ng patuloy na pakikiisa ni Khonghun sa iba’t ibang sektor ng mga manggagawa sa unang distrito ng Zambales, kabilang ang mga manggagawang may mahalagang papel sa paghahatid ng mga produkto at pagpapatakbo ng lokal na kalakalan.
Sa gitna ng patuloy na paglawak ng serbisyong delivery, nananatiling mahalaga ang suporta sa mga rider na nag-uugnay sa mga negosyo at mamimili sa lungsod.